Izg‘irindan...

Изғириндан пок ғубор кутдим,
Қордан хабар бўлса, айтинглар.
Бир оҳ кутдим, мунгли зор кутдим,
Тордан хабар бўлса, айтинглар.

Мен азобдан ҳузур изладим,
Сур дунёдан сурур изладим,
Осмон қадар ғурур изладим —
Ордан хабар бўлса, айтинглар.

Кўнгил сўзи — асл номадир,
Ҳижрон ўзи васлномадир,
Ишқ бу — гўзал қатлномадир —
Дордан хабар бўлса, айтинглар.

Хоким лойга қорилмай туриб,
Дилдан дилга борилмай туриб,
Юракларим ёрилмай туриб
Ёрдан хабар бўлса, айтинглар.

Умр — эрта борлигинг сир кун,
Бахтга интиқ ва интизор кун,
Бу дунёда йўқ бўлсам бир кун,
Бордан хабар бўлса, айтинглар.

Suhrob Ziyo